«Շուհել» խմբակի տեսլականն է սոցիալական հնարավորությունների հավասարությունը և սոցիալական մեկուսացման նվազեցումը՝ հիմնական ուշադրությունը կենտրոնացնելով այն կանանց վրա, որոնք հայտնվել են կյանքի դժվարին իրավիճակներում՝ երբեմն զուրկ լինելովվ պատշաճ բարձրագույն կրթություն, մասնագիտական հմտությունների և ինքնազարգացման, կարիերայի կառուցման ու սոցիալականացման հնարավորություններից: Նմանատիպ անձնական պատմություններ ու խնդիրներ ունեցող կանանց համար 2017թ. ստեղծված քննարկումների փոքր խմբակն աստիճանաբար զարգացավ՝ դառնալով ոգեշնչման ու գոտեպնդման մի յուրօրինակ նախաձեռնություն:

Ընտանեկան կամ սեռական բռնության ենթարկված և իրենց ընտանիքների համար ապրուստի միջոց հայթայթող կանայք, որոնք նաև «Կանանց ռեսուրսային կենտրոն»-ի շահառուներն են, այստեղ կարող են կիրառել և զարգացնել ասեղնագործության, կարի, շյուղագործության, զարդագործության, խմորեղենի արտադրության իրենց հմտությունները՝ դրանք վերածելով շուկայում մրցունակ ապրանքների: Բացի արժանապատիվ աշխատանքից ստացվող բավարարվածությունից, այսպիսի սոցիալական ձեռներեցության շնորհիվ նրանք նաև ձեռք են բերում ֆինանսական անկախություն, որը նրանց դարձնում է ավելի ինքնավստահ՝ կյանքի մյուս ոլորտներում ևս սեփական կարողությունների սահմաններն ավելի վճռականորեն ընդլայնելու համար: Սեփական ուժերով եկամուտ ստեղծելով՝ այս կանայք դրական փոփոխություններ են բերում սեփական կյանքում՝ վերափոխելով իրենց անձնական առաջնահերթությունները և կառավարելով սեփական բարօրությունը իրենց նախընտրած ընթացքով ու եղանակներով: «Շուհել» խմբակի անդամների կյանքի որակը բարելավվում է բազմաթիվ ուղղություններով՝ ինքնարտահայտման համար ապահով տարածքի մաս լինելու գիտակցումից, մինչև ինքնակառավարման կատարելագործման նոր հայացքներ և առողջապահական ծառայությունների հասնելիության ձեռք բերում:

• Սոցիալական ձեռներեցություն. «Շուհել» խմբակի անդամները գործում են մեծ եռանդով՝ սեփական եկամտի ապահովման համար: Հիմնականում չունենալով աշխատանքային փորձ և ենթարկվելով տարիքային խտրականության՝ նրանցից շատերը բախվել են աշխատանքի շուկայի անտեսմանը՝ ի վերջո «Շուհել» խմբակում գտնելով այն ապահով հանգրվանը, որտեղ կարող են դրսևորել իրենց տաղանդները: Նրանց արտադրանքը հանրայնացվում ու վաճառվում է տարբեր հարթակներում՝ վայելելով ճանաչում և ոգեշնչելով նորանոր կանանց:

• Հմտությունների զարգացման աշխատարաններ. «Շուհել» խմբակի անդամները հնարավորություն ունեն զարգացնելու ու բացահայտելու նոր ստեղծարար ունակություններ արտադրության և վաճառքի ոլորտներում: Նրանք ոչ միայն ձգտում են անհատական և հավաքական գերազանցության, այլև խանդավառությամբ հանդես են գալիս վարպետության դասերով՝ ոգեշնչելով նաև ուրիշների:

• Սոցիալ-մշակութային միջոցառումներ. Հաճախակի կազմակերպվող արշավների և հավաքույթների շրջանակներում «Շուհել» խմբակի անդամները վայելում են ազատ ինքնարտահայտման հնարավորությունը՝ վերհանելով բազմաթիվ խնդիրներ, որոնց բախվում են առօրյա կյանքում: Այս անկաշկանդությունից բխող մտերմության շնորհիվ ձևավորում է անպիսի ապահով մթնոլորտ, որտեղ կարելի է կիսվել, սովորել, մտորել և քաջալերել միմյանց՝ առանց քննադատվելու և երկյուղածության:

• Ուսուցողական քննարկումներ առողջապահության (ներառյալ՝ մտավոր առողջության) ոլորտի մասնագետների հետ. «Շուհելի» շատ անդամներ ունեն աղքատիկ պատկերացումներ իրենց ֆիզիկական և հոգեկան առողջության կարիքների վերաբերյալ՝ հատկապես նրանց սեռական և վերարտադրողական առողջության առումով: Սրա պատճառները մասամբ թաքնված են հայ հասարակության այն արմատացած ընկալումներում կամ հասարակական կառուցակարգերում, որոնց պատճառով կնոջը վերագրվում է ընտանիքի խնամատարի դերը, ինչը շատ հաճախ ստվերում է նրանց սեփական կարիքները: Սա նվազեցնում է սեփական առողջական խնդիրների մասին նրանց իրազեկվածության մակարդակը, որն, ի վերջո, վտանգի տակ է դնում նրանց առողջությունը պահպանելու կամ վերականգնելու հնարավորությունը՝ երկարաժամկետ հեռանկարում նրանց տկարացնելով որպես հասարակության անդամներ: «Շուհելն» օգտագործում է ցանկացած հնարավորություն` հրավիրելու առողջապահության ոլորտի մասնագետների, որոնք փորձում են բարձրացնել անդամների իրազեկության մակարդակը և սեփական առողջության մասին ընկալումները` վերարտադրողականից մինչև հոգեկան բարեկեցություն: Բացի այդ, նախագծի առանցքային նպատակներից է բավարար ֆինանսական միջոցների հավաքագրումը՝ Շուելի անդամների համար ապահովելու պարբերական բուժզննումներ, հետազոտություններ ու գնահատումներ, ինչպես նաև բուժումներ՝ ըստ անհրաժեշտության: