«Ջերմիկ Անկյուն» հիմնադրամը ստեղծվել է 2006 թվականին, որի առաքելությունն է ստեղծել մշտական կացարաններ հատուկ կարիքներ ունեցող այն միայնակ երիտասարդների համար, ովքեր չափահաս դառնալուց հետո պետք է լքեն մանկատները, սակայն ինքնուրույն ապրել չեն կարող:

Թե՛ Հայաստանում, թե՛ ամբողջ աշխարհում հատուկ կարիքներ ունեցող մարդիկ իրականում առավել խոցելի են, այն դեպքում, որ նրանք ունեն հատուկ խնամքի ու վերաբերմունքի կարիք, իսկ հատուկ կարիքներով մանկատան սաների պարագայում խնդիրը շատ ավելի խորն է և համակարգային: «Ջերմիկ Անկյուն» հիմնդրամը, արձագանքելով այս խնդրին, 2006 թ-ին ստեղծեց առաջին խմբային տունը Երևանում և տարիների ընթացքում զարգացնելով այն որպես այլընտրանքային մոդել, ստեղծեց ևս երկու տուն Կոտայքի և Արարատի մարզերում։

«Ջերմիկ Անկյուն»-ն իրական տուն է դարձել ավելի քան 29 շահառուների համար, ովքեր ապրում են այդ տներում, ստանում բազմաթիվ ծառայություններ, անցնում տարատեսակ թերապիաներ՝ հիմք ընդունելով նրանց զբաղվածությունը: Այլ կերպ ասած ապրում են հասարակությունում որպես լիիրավ անդամ՝ առաջ բերելով իրենց իրավունքները։

Չնայած համավարակային խառնաշփոթին՝ այս տարի հիմնադրամի կողմից Արարատի մարզում բացվեց երրորդ խմբային տունը, որն արդեն իսկ տուն է դարձել յոթ շահառուների համար: Սակայն տունը ուներ նաև կից տարածք, որը նախատեսվում էր դարձնել զբաղվածության և թերապիայի տնակ, որի համար միջոցներ հայթհայթելու խնդիր կար:

Նման հրաշալի կազմակերպությունն ու նախաձեռնությունը չէր կարող անտարբեր թողնել «Այո»-ի թիմին: Մենք առանց երկմտելու որոշեցինք աջակցել «Ջերմիկ Անկյան»-ը, էլ ավելի ջերմացնել իրենց կացարանը և վերակենդանացնել տանը կից զբաղվածության և թերապիայի տնակը: