«Հայ օգնության ֆոնդը» (ՀՕՖ) 2018 թվականին Արագածոտնի մարզում սկսել է «Փոխակերպելով երեխաների առողջությունն ու զարգացումը» ծրագիրը: Երեխաների սննդակարգի բարելավումն ուղղված է թերսնուցման և թերաճության հաղթահարմանը:

Նախադպրոցական տարիքի երեխաների թերսնուցումը լուրջ խնդիր է՝ կյանքի ընթացքում ուղեկցվող լուրջ հետևանքներով: Այն կարող է հանգեցնել ֆիզիկական և մտավոր զարգացման հապաղման, կանանց պարագայում՝ ցածր քաշով երեխաներ ծննդաբերելու խնդիրների։

Այս ամենից խուսափելու համար կարևոր է առողջ, բալանսավորված և անհրաժեշտ կալորիականությամբ սննդով ապահովել երեխաներին հատկապես մինչև 5 տարեկան դառնալը։ Հենց այդ տարիքի երեխաներն են համարվում այն խոցելի խումբը, որը հեշտությամբ կարող է ձեռք բերել թերսնման հետևանք հադիսացող հիվանդությունները, որոնք հետագայում գրեթե ենթակա չեն բուժման:

«Հայաստանի ժողովրդագրության և առողջության հարցերի հետազոտության» 2015-16 թվականների արդյունքներով՝ Արագածոտնի մարզի 5 տարեկանից ցածր երեխաների 29 տոկոսն ունի տարիքին համապատասխան միջինից ցածր հասակ, 18.7 տոկոսը՝ միջինից ցածր քաշ (աղբյուր, էջ 153):

Իրազեկման և կրթության պակասը ևս նպաստում է թերսնուցմանը։ «Զարգացումը երեխաների սննդի բարեփոխման և առողջ սերնդի ձևավորման միջոցով» ծրագրի մեկնարկից ի վեր «ՀՕՖ»-ը առողջ և բալանսավորված սնունդ ապահովելուն զուգահեռ նաև ծնողների և մանկավարժների համար տեղեկատվական դասընթացներ և սեմինարներ է կազմակերպում: «Այո»-ն ևս որոշեց միանալ «ՀՕՖ»-ի այս կարևոր առաքելությանը՝ ձգտելով անհրաժեշտ ֆինանսավորման միջոցով հաղթահարել թերսնուցումը և դրա հետևանք հանդիսացող մի շարք առողջական խնդիրներ նախադպրոցական տարիքի երեխաների շրջանում:

«Այո»-ն պատրաստ է կենտրոնացնել իր ողջ ներուժը, որպեսզի ունենանք առողջ սերունդ և կայուն ապագա, ինչին այդքան ջանասիրաբար ձգտում ենք բոլորս: