«Հավասար իրավունքներ, հավասար հնարավորություններ» (EREO) ՀԿ-ն հիմնադրվել է 2014 թվականին հաշմանդամություն ունեցող անձանց կողմից և նպատակ ունի օժանդակել Լոռու մարզում հաշմանդամություն ունեցող մարդկանց իրավունքների լիակատար իրացմանը և նրանց լիարժեք մասնակցությանը հասարակական կյանքին:

ՀԿ-ն ակտիվորեն զբաղվում է հաշմանդամություն ունեցող անձանց շահերի պաշտպանության, նրանց կրթության, զբաղվածության իրավունքների և խնդիրների վերհանման և լուծման, ինչպես նաև հաշմանդամություն ունեցող կանանց իրավունքների պաշտպանության, նրանց առաջնորդական որակների զարգացման, վերջիններիս հանդեպ խտրականության վերացման հարցերով: Կազմակերպության ուղղակի շահառուների թիվը անցնում է 300-ը, իսկ անուղղակի շահառուների թիվը 500-ը:

2017 թվակականին «Եվրոպական միության» (EU) ֆինանսավորմամբ և «Միջմշակութային Ուսումնասիրությունների, Ուսուցման և Երկխոսության Միջազգային Կենտրոն»-ի (ICIRLD) աջակցությամբ ՀԿ-ն հիմնադրել է կարի արտադրության սոցիալական ձեռնարկատիրություն։ Արտադրամասում երկամսյա դասընթացից հետո աշխատանքի են անցել սոցիալապես անապահով ընտանիքների անդամներ և հաշմանդամություն ունեցող անձիք։ Նրանք հայկական ավանդական տիկնիկներ, դեկորատիվ բարձեր, անկողնային պարագաներ և մանկական գոգնոցներ են կարում և ասեղնագործում, ինչպես նաև մատուցում են տպագրական ծառայություններ:

Հիմնադրման պահից կազմակերպությունը ունեցել է գրասենյակային տարածքի խնդիր, սակայն 2018-ին այս խնդրի լուծման նպատակով կազմակերպված դրամահավաքի շնորհիվ կարողացել են ձեռք բերել մշտական տարածք: Սակայն այն հարմարեցված չէ հաշմանդամություն ունեցող անձանց պահանջմունքներին՝ չկա ջեռուցման համակարգ, պատուհանները հին են և կոտրված, սանհանգույցը և խոհանոցը հարմարեցված չէ հաշմանդամություն ունեցող մարդկանց կարիքներին:

Այո-ն որոշել է անմասն չմնալ ու աջակցել այս կարևոր նախաձեռնությանը: Այս պահին ջեռուցման համակարգը, հաշմանդամություն ունեցող անձանց համար հարմարեցված դռները, սանհանգույցը և խոհանոցը այն առաջնային անհրաժեշտություններն են, որոնք կնպաստեն կենտրոնի ակտիվ գործունեության ծավալմանը և՛ ձմռանը, և՛ ամռանը:

Դու էլ միացի՛ր այս կարևոր շարժմանը և Այո՛ ասա ավելի ներառական հասարակության ստեղծմանը: